महिलांचा आधार गेला; ज्येष्ठ समाजसेविका अपर्णा रामतीर्थकर यांचे निधन

सोलापूर: सोलापुरातील ज्येष्ठ नाट्य कलावंत, सामाजिक कार्यकर्त्या, वक्त्या ॲड. अपर्णा अरूण रामतीर्थकर (वय ६५) यांचे अर्धांगवायुच्या आजाराने मंगळवारी दुपारी सोलापुरात निधन झाले. त्यांच्या पश्चात आई, मुलगा आशुतोष, सून रश्मी आणि नातू असा परिवार आहे.

मूळच्या पुण्याच्या असलेल्या अपर्णा रामतीर्थकर सोलापुरात आपले दिवंगत पती तथा ज्येष्ठ पत्रकार अरूण रामतीर्थकर यांच्याबरोबर आल्या आणि सोलापूरकर झाल्या. त्या उत्तम हौशी नाट्य कलावंत होत्या. हिंदुत्व विचारसरणीचा पगडा असलेल्या अपर्णा रामतीर्थकर यांनी सामाजिक व कौटुंबिक स्वास्थ्य टिकविण्यासाठी ‘चला नाती जपू या’, ‘आईच्या जबाबदाऱ्या’ यासारख्या विषयांवर तीन हजारांहून अधिक व्याख्याने दिली होती. तुटणारी घरे वाचविली पाहिजेत, यासाठी त्यांनी प्रयत्न केले. ‘पाखर संकुल’, ‘उद्योगवर्धिनी’ आदी संस्थांशी त्यांचा संबंध होता.

त्या मोठ्या लोकप्रिय वक्त्या होत्या. त्या शास्त्रांचा आधार घेऊन हिंदू धर्म, संस्कृती आणि भारतीय परंपरेबद्दल बोलत असायच्या.त्यांचा श्रोताही मुख्यतः ग्रामीण आणि शहरी भागातील पुरुष मंडळी आणि सर्व वयोगटातील महिला होत्या. त्यांना यूट्यूबवर ऐकणारा एक मोठा वर्ग आहे.

अपर्णा रामतीर्थकर यांची युट्यूब वर अनेक भाषणे लोकप्रिय आहेत त्यांच्या व्हिडिओना लाखो व्ह्यूज आहेेेत.’चला नाती जपूया’, ‘सासू-सुनेनी कसे रहावे’, ‘आई’, ‘एकत्र कुटुंब पद्धती आणि मुली’ या विषयांवरची त्यांची व्याख्याने खूप मोठ्या प्रमाणात लोकप्रिय झाली आहेत.

त्यांच्या निधनामुळे अनेक मुलींची आई गेली तर अनेक सुनांची प्रेमळ पण कर्तव्यकठोर सासू गेली अशी प्रतिक्रिया समाज माध्यमांमधून व्यक्त होत आहे.